“Qishloq joylarni barqaror rivojlantirish” loyihasi doirasida Urganch tumanida qurilishlar olib borilmoqda

O‘zbekiston Respublikasi Prezidentining 2021-yil 8-sentabrdagi “Islom taraqqiyot banki va OPEK xalqaro taraqqiyot jamg‘armasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari to‘g‘risida”gi PQ-5246-sonli qaroriga asosan Xorazm viloyatidagi qurilishlarda ish qizg‘in davom etmoqda. Jumladan, Urganch tumanida joylashgan “Gulobod” MFY hududida 150 o‘ringa mo‘ljallangan maktabgacha ta’lim tashkilotini qurilmoqda.

Pudratchi tashkilot “Xorazm Bobur Mirzo” MChJ tomonidan amalga oshirilayotgan obyektda bugungi kunda 11 nafar quruvchilar ishlamoqda. Subloyihadan topshirilishi natijasida manfaatdor aholi 2200 dan ortiq kishini tashkil etishi kutilmoqda.

Shuningdek, mazkur loyiha doirasida tumandagi “Hidoyat” MFYda aholiga maishiy xizmat ko‘rsatuvchi mahalla markazi qurilishi ham davom etmoqda. Umumiy maydoni 800 m²ni tashkil etuvchi ushbu obyektning qiymati 3 mlrd. 766,5 mln. so‘mni tashkil qilishi belgilangan va qurilish ishlari “Orion fortuna plus” MChJ tomonidan amalga oshirib kelinmoqda.

3 qavatli mazkur binoda o‘quv markazlari, go‘zallik saloni, sartaroshxona, dorixona, bank vakillari uchun maxsus xonalar, mahalla fuqarolar yig‘ini raisi, hokim yordamchisi, xotin-qizlar faoli, yoshlar yetakchisi va profilaktika inspektori uchun xizmat xonalari, kimyoviy tozalash xizmati, fitnes zali, qandolatchilar ustaxonasi va savdo do‘koni faoliyati yo‘lga qo‘yiladi.