“Qishloq joylarni kompleks rivojlantirish” (2-bosqich) loyihasi muhokamasiga bag‘ishlangan yig‘ilish bo‘lib o‘tdi

Iqtisodiyot va moliya vaziri o‘rinbosari Samandar Sadullaev ishtirokida “Qishloq joylarni kompleks rivojlantirish” (2-bosqich) loyihasi doirasida aloqador tashkilotlar ishtirokida "ZOOM" ilovasi orqali yig‘ilish o‘tkazildi.

Unda Qashqadaryo, Samarqand va Surxondaryo viloyati hokimlarining o'rinbosarlari, hududlardagi “Yagona buyurtmachi xizmati” IK DUK, “Avtomobil yo‘llari qo‘mitasi”, “Hududiy elektr tarmoqlari”, “Oʻzsuvta’minot” AJ, “Qishloqqurilishloyiha” davlat muassasasi instituti rahbariyati va Birlashtirilgan loyihalarni amalga oshirish guruhi xodimlari ishtirok etishdi.

Loyiha doirasida ko‘makchi hamkor BMT Taraqqiyot Dasturi tomonidan mahallalarda jamoa safarbarlik ishlari yakunlanib, 684 ta birlamchi dolzarb subloyihalar aniqlangan bo‘lib, ularni tegishli vazirlik va idoralar bilan kelishish hamda tasdiqlash jarayoni muhokama qilindi.

Shuningdek, loyihani jadallashtirish borasida hukumat tomonidan qabul qilingan Farmoyishlarda ko‘rsatilgan vazifalar soha va tarmoq korxona hamda manfaatdor hokimliklar bilan bajariladigan ishlar hajmi belgilab olindi.

Yig‘ilish davomida obyektlarning bir bosqichli loyiha hujjatlarini ishlab chiqish va mualliflik nazoratini amalga oshirish, loyiha tashkilotlari tomonidan obyektlarning loyiha-smeta hujjatlarini ishlab chiqib, ekspertiza xulosalari olinishini jadallashtirish kabi masalalarga ham to‘xtalib o‘tildi.