Yangiliklar
Iqtisodiyot va moliya vazirligining “Qishloq joylarni barqaror rivojlantirish” loyihasi doirasida Xorazm viloyatida navbatdagi Mahalla maishiy xizmat ko‘rsatish markazlarining ochilishi bo‘lib o‘tdi. Pudratchi tashkilot “Jahon Qilich” MChJ tomonidan Navro‘z bayrami arafasida Hazorasp tumanining “Bo‘ston” MFYda qurib bitkazilgan 3 qavatli markaz aholiga turli xizmatlar ko‘rsatishga mo‘ljallangan.
Ochilish marosimida tumanning yangi tayinlangan hokimi Maqsudbek Abdullaev ishtirok etib, obyektning mahalliy aholi va tadbirkorlarga yaratadigan qulayliklari, ulardan samarali foydalanish imkoniyatlari bilan tanishdi.
Mahalla maishiy xizmat ko‘rsatish markazi qishloq aholisining ehtiyojlarini inobatga olgan holda tashkil etilgan bo‘lib, bu yerda turli ijtimoiy maslahatlar beriladi, maishiy va ma’muriy masalalar hal etiladi. Bu yerda aholi uchun zarur xizmatlar va qulayliklar yaratilgan.
Binoning birinchi qavatida go‘zallik saloni, sartaroshxona, dorixona, bank vakillari uchun maxsus xonalar, mahalla fuqarolar yig‘ini raisi, hokim yordamchisi, xotin-qizlar faoli, yoshlar yetakchisi va profilaktika inspektori uchun xizmat xonalari joylashgan. Shuningdek, bu yerda davlat xizmatlari markazi, qandolatchilik sexi va savdo do‘koni ham faoliyat ko‘rsatadi.
Ikkinchi qavat asosan o‘quv markazlari uchun mo‘ljallangan bo‘lib, bu yerda kasbga yo‘naltirish markazi, kimyoviy tozalash xizmati va fitnes zali kabi obyektlar faoliyati yo‘lga qo‘yildi. Uchinchi qavat esa tikuvchilik xonasi, maishiy texnika ustaxonasi va yoshlar markazi uchun ajratildi.
Shu kuni Xorazm viloyatining Yangibozor tumanida joylashgan “Hamid Olimjon” mahallasida ham xuddi shunday markazning ochilishi bo‘lib o‘tdi. Unda qatnashgan mahalla ahli, loyiha tashabbuskorlari Navro‘z arafasida shu kabi obyektlar foydalanishga topshirilishini yuksak baholadilar.
Bu kabi markazlar qishloq aholisi uchun ko‘p tomonlama qulaylik yaratish bilan bir qatorda, tadbirkorlik va hunarmandchilikni rivojlantirish, bandlikni oshirish, mahalliy iqtisodiyotni rivojlantirishda ham muhim ahamiyat kasb etadi.
Qishloq joylarni barqaror rivojlantirish” loyihasi doirasida respublika bo‘ylab shu kabi 40 ta markazlar qurilishi rejalashtirilgan. Maqsad chekka hududlardagi aholining turmush sharoitini yaxshilash, mahallaning o‘sish nuqtasidan kelib chiqib xizmat ko‘rsatish faoliyati sifatini oshirish, ularning uzog‘ini yaqin qilish, kambag‘allikni qisqartirish, yangi ish o‘rinlari yaratish va pirovard natijada mahalliy aholi daromadlarini oshirish orqali ularning turmush darajasini yuksaltirishdan iborat.